طالبان نیروهای استشهادی را به ‌مرز با تاجیکستان فرستاد

به گزارش «شیعه نیوز»، مقام‌های محلی طالبان می‌‌گویند کندک انتحاری این تحریک در ولایت‌های شمال شرقی از جمله بدخشان ایجاد شده‌است.

عبدالباسط بدر؛ مسئول قطعه نظامی کندک «استشهادی» طالبان به رسانه‌ها گفته است که نیروهای این کندک، به زودی برای انجام وظیفه به ولسوالی اشکاشم مستقر خواهند شد.

او گفته است که این قطعه با سلاح‌های روسی.‌ام فور‌، ام شانزده، پیکا و راکت و سلاح‌های خفیفه و ثقیله مجهز است.

طالبان پیش از این نیز از مستقرشدن شاخه کندک نظامی «استشهادی» خود در ولایت قندوز در مرز تاجیکستان خبر داده بودند.

به تازگی مقام‌های روسیه از افزایش تنش میان طالبان و تاجیکستان ابراز نگرانی کرده اند و می‌گویند کابل و دوشنبه باید برای حل تنش‌ها در مرز تاجیکستان و افغانستان راه‌حل قابل قبول را جستجو کنند.

طالبان به اظهارات امام‌علی رحمان؛ رییس جمهوری تاجیکستان که خواستار دولت فراگیر در افغانستان شده بود، واکنش تند نشان دادند.

ملا عبدالغنی برادر؛ معاون اول رییس دولت طالبان گفته‌است، تاجیکستان در امور داخلی افغانستان مداخله می‌کند. او هشدار داده که هر اقدامی واکنش نیز خواهد داشت.

ملا برادر می‌گوید که طالبان به کشورهای همسایه اجازه نخواهد داد که درگیری فرقه‌ای و قومی را به راه‌اندازد.

رییس جمهوری تاجیکستان بر تشکیل دولت فراگیر با اشتراک گسترده تاجیک‌ها تاکید دارد.

رحمان اخیرا در مجمع عمومی ملل متحد گفت به کار‌های داخلی افغانستان دخالت نمی‌کند؛ اما همه قشر‌ها باید در حکومت سهیم باشند.

به نظر می‌رسد روابط طالبان و تاجیکستان بر سر جبهه ملی مقاومت به رهبری احمد مسعود؛ پسر احمد شاه مسعود نیز تیره شده‌است.

اخیرا برخی رسانه‌ها گزارش دادند که تاجیکستان به پایگاه جبهه مقاومت ضد طالبان تبدیل شده‌است.

گفتنی است که تاجیکستان پس از سقوط دولت به دست طالبان، تحرکات نظامی خود در مرز افغانستان را بخاطر تهدیدات داعش گسترش داده‌است.

انتهای پیام